בחר פרק (1-91)
ספר הישר - פרק ע״ח
קורח
א׳
ויקח קורח בן יצהר בן קהת בן לוי ודתן ואבירם בני אליאב ואון בן פלת בני ראובן ויקומו לפני משה.
ב׳
ואנשים מבני ישראל חמישים ומאתיים נשיאי עדה קריאי מועד אנשי שם ויקהלו על משה ועל אהרן.
ג׳
ויאמרו אליהם רב לכם כי כל העדה כולם קדושים ובתוכם ה' ומדוע תתנשאו על קהל ה'.
ד׳
וישמע משה ויפול על פניו וידבר אל קורח ואל כל עדתו לאמור בוקר ויודע ה' את אשר לו ואת הקדוש והקריב אליו.
ה׳
ויאמר משה אל קורח שמעו נא בני לוי המעט מכם כי הבדיל אלהי ישראל אתכם מעדת ישראל להקריב אתכם אליו.
ו׳
ותבקשו גם כהונה ויאמר משה לכן אתה וכל עדתך הנועדים על ה' ואהרן מה הוא כי תלינו עליו.
ז׳
וישלח משה לקרוא לדתן ולאבירם בני אליאב ויאמרו לא נעלה המעט כי העליתנו מארץ זבת חלב ודבש להמיתנו במדבר.
ח׳
ויחר למשה מאוד ויאמר אל ה' אל תפן אל מנחתם לא חמור אחד מהם נשאתי ולא הרעותי את אחד מהם.
ט׳
ויאמר משה אל קורח אתה וכל עדתך היו לפני ה' אתה והם ואהרן מחר ויקחו איש מחתתו.
י׳
ויקח קורח את כל העדה אל פתח אוהל מועד וירא כבוד ה' אל כל העדה.
י״א
וידבר ה' אל משה ואל אהרן לאמור הבדלו מתוך העדה הזאת ואכלה אותם כרגע.
י״ב
ויפלו על פניהם ויאמרו אל אלהי הרוחות לכל בשר האיש אחד יחטא ועל כל העדה תקצוף.
י״ג
ויאמר ה' אל משה דבר אל העדה לאמור העלו מסביב למשכן קורח דתן ואבירם.
י״ד
ויעלו מעל משכן קורח דתן ואבירם מסביב ודתן ואבירם יצאו ניצבים פתח אוהליהם ונשיהם ובניהם וטפם.
ט״ו
ויאמר משה בזאת תדעון כי ה' שלחני לעשות את כל המעשים האלה כי לא מליבי.
ט״ז
אם כמות כל האדם ימותון אלה ופקודת כל האדם יפקד עליהם לא ה' שלחני ואם בריאה יברא ה' ופצתה האדמה את פיה ובלעה אותם.
י״ז
ויהי ככלותו לדבר את כל הדברים האלה ותבקע האדמה אשר תחתיהם ותפתח הארץ את פיה ותבלע אותם ואת בתיהם.
י״ח
ואת כל האדם אשר לקורח ואת כל הרכוש וירדו הם וכל אשר להם חיים שאולה ותכס עליהם הארץ ויאבדו מתוך הקהל.
י״ט
וכל ישראל אשר סביבותיהם נסו לקולם כי אמרו פן תבלענו הארץ.
כ׳
ואש יצאה מאת ה' ותאכל את החמישים ומאתיים איש מקריבי הקטורת.
כ״א
ויהי ממחרת וילונו כל עדת בני ישראל על משה ועל אהרן לאמור אתם המיתם את עם ה' ויחל הנגף בעם.
כ״ב
ויאמר משה אל אהרן קח את המחתה ותן עליה אש מעל המזבח ושים קטורת והולך מהרה אל העדה וכפר עליהם.
כ״ג
ויקח אהרן כאשר דיבר משה וירץ אל תוך הקהל ויעמוד בין המתים ובין החיים ותעצר המגפה.
על הפרק
פרק זה מתאר את מרד קורח בן יצהר ועדתו נגד משה ואהרן. קורח ודתן ואבירם ומאתיים וחמישים איש ערערו על סמכות משה ואהרן, והארץ פתחה את פיה ובלעה את קורח ואת כל אשר לו, ואש יצאה מלפני ה' ותאכל את מקריבי הקטורת.