בחר פרק (1-91)
ספר הישר - פרק י״ט
הפיכת סדום
א׳
ויבואו שני המלאכים סדומה בערב ולוט יושב בשער סדום, וירא לוט ויקם לקראתם וישתחו אפים ארצה.
ב׳
ויאמר הנה נא אדני סורו נא אל בית עבדכם ולינו ורחצו רגליכם והשכמתם והלכתם לדרככם, ויאמרו לא כי ברחוב נלין.
ג׳
ויפצר בם מאד ויסורו אליו ויבואו אל ביתו ויעש להם משתה ומצות אפה ויאכלו.
ד׳
טרם ישכבו ואנשי העיר אנשי סדום נסבו על הבית מנער ועד זקן כל העם מקצה, ויקראו אל לוט ויאמרו לו איה האנשים אשר באו אליך הלילה הוציאם אלינו.
ה׳
ויצא אליהם לוט הפתחה והדלת סגר אחריו, ויאמר אל נא אחי תרעו, ויתחננו אליהם לבלתי עשות רעה לאורחיו.
ו׳
ויאמרו גש הלאה ויאמרו האחד בא לגור וישפוט שפוט, עתה נרע לך מהם, ויפצרו באיש בלוט מאד ויגשו לשבור הדלת.
ז׳
וישלחו האנשים את ידם ויביאו את לוט אליהם הביתה ואת הדלת סגרו, ואת האנשים אשר פתח הבית הכו בסנורים מקטן ועד גדול וילאו למצוא הפתח.
ח׳
ויאמרו האנשים אל לוט עוד מי לך פה חתן ובניך ובנותיך וכל אשר לך בעיר הוצא מן המקום, כי משחיתים אנחנו את המקום הזה כי גדלה צעקתם את פני ה וישלחנו ה לשחתה.
ט׳
ויצא לוט וידבר אל חתניו לוקחי בנותיו ויאמר קומו צאו מן המקום הזה כי משחית ה את העיר, ויהי כמצחק בעיני חתניו.
י׳
וכמו השחר עלה ויאיצו המלאכים בלוט לאמר קום קח את אשתך ואת שתי בנותיך הנמצאות פן תספה בעוון העיר.
י״א
ויתמהמה ויחזיקו האנשים בידו וביד אשתו וביד שתי בנותיו בחמלת ה עליו ויוציאוהו ויניחוהו מחוץ לעיר.
י״ב
ויאמרו המלך על נפשך אל תביט אחריך ואל תעמוד בכל הככר ההרה המלט פן תספה, ויאמר לוט אליהם לא נא אדני הנה נא העיר הזאת קרובה לנוס שמה והיא מצער.
י״ג
ויאמרו אליו הנה נשאתי פניך גם לדבר הזה לבלתי הפוך את העיר אשר דברת, מהר המלט שמה כי לא אוכל לעשות דבר עד בואך שמה.
י״ד
והשמש יצא על הארץ ולוט בא צוערה, וה המטיר על סדום ועל עמורה גפרית ואש מאת ה מן השמים.
ט״ו
ויהפוך את הערים האל ואת כל הככר ואת כל יושבי הערים וצמח האדמה, ותהי הארץ כולה שממה וחורבן.
ט״ז
ותבט אשת לוט מאחריו ותהי נציב מלח, כי לא שמעה לדברי המלאכים ולבה היה עם אנשי סדום ותחמול עליהם.
י״ז
וישכם אברהם בבוקר אל המקום אשר עמד שם את פני ה, וישקף על פני סדום ועמורה ועל כל פני ארץ הככר וירא והנה עלה קיטור הארץ כקיטור הכבשן.
י״ח
ויהי בשחת אלהים את ערי הככר ויזכור אלהים את אברהם וישלח את לוט מתוך ההפכה בהפוך את הערים אשר ישב בהן לוט.
י״ט
ויעל לוט מצוער וישב בהר ושתי בנותיו עמו כי ירא לשבת בצוער, וישב במערה הוא ושתי בנותיו.
כ׳
ויהי כאשר ראו בנות לוט כי נשמדה הארץ כולה ואין איש באשר סביבותיהם, ותאמר הבכירה אל הצעירה אבינו זקן ואיש אין בארץ לבוא עלינו כדרך כל הארץ, לכה נשקה את אבינו יין ונשכבה עמו ונחיה מאבינו זרע.
על הפרק
פרק זה מתאר את חורבן סדום ועמורה, ביאת המלאכים אל לוט, רשעת אנשי סדום, הצלת לוט ובנותיו, והפיכת אשת לוט לנציב מלח.