ספר הישר

מאדם הראשון ועד כיבוש הארץ

בחר פרק (1-91)

א׳ ויגש אליו יהודה ויאמר בי אדני ידבר נא עבדך דבר באזני אדני ואל יחר אפך בעבדך כי כמוך כפרעה.

ב׳ אדני שאל את עבדיו לאמר היש לכם אב או אח ונאמר אל אדני יש לנו אב זקן וילד זקנים קטן ואחיו מת ויותר הוא לבדו לאמו ואביו אהבו.

ג׳ ותאמר אל עבדיך הורדהו אלי ואשימה עיני עליו ונאמר אל אדני לא יוכל הנער לעזב את אביו ועזב את אביו ומת.

ד׳ ותאמר אל עבדיך אם לא ירד אחיכם הקטן אתכם לא תספון לראות פני וכי עלינו אל אבינו ונגד לו את דברי אדני.

ה׳ ויאמר אבינו שובו שברו לנו מעט אכל ונאמר לא נוכל לרדת אם יש אחינו הקטן אתנו וירדנו.

ו׳ ויאמר אבינו אלינו אתם ידעתם כי שנים ילדה לי אשתי ויצא האחד מאתי ואמר אך טרף טרף ולא ראיתיו עד הנה.

ז׳ ולקחתם גם את זה מעם פני וקרהו אסון והורדתם את שיבתי ברעה שאלה ועתה כבאי אל אבי ונפש אבי קשורה בנפש הנער.

ח׳ והיה כראותו כי אין הנער ומת והורידו עבדיך את שיבת אבינו ביגון שאלה כי עבדך ערב את הנער מעם אבי.

ט׳ ועתה ישב נא עבדך תחת הנער עבד לאדני והנער יעל עם אחיו כי איך אעלה אל אבי והנער איננו אתי פן אראה ברע אשר ימצא את אבי.

י׳ ולא יכל יוסף להתאפק לכל הנצבים עליו ויקרא הוציאו כל איש מעלי ולא עמד איש אתו בהתודע יוסף אל אחיו.

י״א ויתן את קלו בבכי וישמעו מצרים וישמע בית פרעה ויאמר יוסף אל אחיו אני יוסף העוד אבי חי.

י״ב ולא יכלו אחיו לענות אתו כי נבהלו מפניו ויאמר יוסף אל אחיו גשו נא אלי ויגשו ויאמר אני יוסף אחיכם אשר מכרתם אתי מצרימה.

י״ג ועתה אל תעצבו ואל יחר בעיניכם כי מכרתם אתי הנה כי למחיה שלחני אלהים לפניכם כי זה שנתים הרעב בקרב הארץ ועוד חמש שנים אשר אין חריש וקציר.

י״ד וישלחני אלהים לפניכם לשום לכם שארית בארץ ולהחיות לכם לפליטה גדלה ועתה לא אתם שלחתם אתי הנה כי האלהים.

ט״ו מהרו ועלו אל אבי ואמרתם אליו כה אמר בנך יוסף שמני אלהים לאדון לכל מצרים רדה אלי אל תעמד.

ט״ז וישבת בארץ גשן והיית קרוב אלי אתה ובניך ובני בניך וצאנך ובקרך וכל אשר לך וכלכלתי אתך שם.

י״ז ויפל על צוארי בנימין אחיו ויבך ובנימין בכה על צואריו וינשק לכל אחיו ויבך עלהם ואחרי כן דברו אחיו אתו.

י״ח והקל נשמע בית פרעה לאמר באו אחי יוסף וייטב בעיני פרעה ובעיני עבדיו.

י״ט ויאמר פרעה אל יוסף אמר אל אחיך זאת עשו טענו את בעירכם ולכו באו ארצה כנען וקחו את אביכם ואת בתיכם ובאו אלי.

כ׳ ואני אתנה לכם את טוב ארץ מצרים ואכלו את חלב הארץ ויתן להם יוסף עגלות על פי פרעה ויתן להם צדה לדרך.

כ״א לכלם נתן לאיש חלפות שמלת ולבנימין נתן שלש מאות כסף וחמש חלפת שמלת ולאביו שלח עשרה חמרים נשאים מטוב מצרים.

כ״ב וישלח את אחיו וילכו ויאמר אלהם אל תרגזו בדרך וילכו אחיו ויעלו ממצרים ויבאו ארצה כנען אל יעקב אביהם.

כ״ג ויגידו לו לאמר עוד יוסף חי וכי הוא משל בכל ארץ מצרים ויפג לבו כי לא האמין להם.

כ״ד וידברו אליו את כל דברי יוסף אשר דבר אלהם וירא את העגלות אשר שלח יוסף ותחי רוח יעקב אביהם.

כ״ה ויאמר ישראל רב עוד יוסף בני חי אלכה ואראנו בטרם אמות.

פרק זה מתאר את נאום יהודה לפני יוסף, התגלות יוסף לאחיו, בכייתם המשותפת, ושליחת יוסף את אחיו להביא את יעקב אביהם למצרים.