בחר פרק (1-91)
ספר הישר - פרק פ״ט
העי וגבעון
א׳
וישלח יהושע אנשים מיריחו העי אשר עם בית און ויאמר אליהם עלו ורגלו את הארץ ויעלו האנשים וירגלו את העי.
ב׳
וישובו אל יהושע ויאמרו אליו אל יעל כל העם כאלפים איש או כשלושת אלפים איש יעלו ויכו את העי אל תייגע שמה את כל העם כי מעט המה.
ג׳
ויעלו מן העם כשלושת אלפים איש וינוסו לפני אנשי העי ויכו מהם אנשי העי כשלושים וששה איש וימס לבב העם.
ד׳
ויקרע יהושע שמלותיו ויפול על פניו ארצה לפני ארון ה' עד הערב ויאמר אהה ה' אלהים למה העברת העביר את העם הזה את הירדן.
ה׳
ויאמר ה' אל יהושע קום לך חטא ישראל וגם עברו את בריתי אשר ציויתי אותם וגם לקחו מן החרם.
ו׳
ויקם יהושע בבוקר ויקרב את ישראל לשבטיו וילכד עכן בן כרמי בן זבדי בן זרח למטה יהודה.
ז׳
ויאמר עכן אמנה אנכי חטאתי לה' אלהי ישראל וכזאת וכזאת עשיתי ואראה בשלל אדרת שנער אחת טובה ומאתיים שקלים כסף ולשון זהב אחד ואחמדם ואקחם.
ח׳
ויקחו אותם ויעלום אל עמק עכור וירגמו אותו כל ישראל אבן וישרפו אותם באש ויסקלו אותם באבנים.
ט׳
ויאמר ה' אל יהושע אל תירא ואל תחת קח עמך את כל עם המלחמה וקום עלה העי ראה נתתי בידך את מלך העי ואת עמו ואת עירו.
י׳
ויקם יהושע וכל עם המלחמה לעלות העי ויבחר יהושע שלושים אלף איש גיבורי החיל וישלחם לילה ויצו אותם לאמור שימו לכם אורב לעיר מאחרי העיר.
י״א
ויהי כצאת אנשי העי לקראת ישראל וינוסו יהושע וכל ישראל לפניהם דרך המדבר והאורב קם ממקומו וילכדו את העיר ויציתוה באש.
י״ב
ויפנו אנשי העי אחריהם ויראו והנה עלה עשן העיר השמימה ולא היה בהם ידיים לנוס הנה והנה ויכם יהושע עד בלתי השאיר לו שריד.
י״ג
בעת ההיא באו יושבי גבעון אל יהושע אל המחנה הגלגל ויעשו בערמה ויתחפשו ויקחו שקים בלים ונאדות יין בלים ומבוקעים.
י״ד
ויאמרו אל יהושע מארץ רחוקה באנו ועתה כרתו לנו ברית ויעש להם יהושע שלום ויכרות להם ברית לחיותם.
ט״ו
ויהי מקצה שלושת ימים אחרי אשר כרתו להם ברית וישמעו כי קרובים הם אליו ובקרבו הם יושבים.
ט״ז
וישמעו חמשת מלכי האמורי מלך ירושלים מלך חברון מלך ירמות מלך לכיש ומלך עגלון ויעלו הם וכל מחניהם ויחנו על גבעון וילחמו עליה.
י״ז
ויאמר ה' אל יהושע אל תירא מהם כי בידך נתתים ויעל יהושע מן הגלגל כל הלילה ויבוא עליהם פתאום.
י״ח
ויהומם ה' לפני ישראל ויכם מכה גדולה בגבעון וה' השליך עליהם אבנים גדולות מן השמים ורבים אשר מתו באבני הברד מאשר הרגו בני ישראל בחרב.
י״ט
אז ידבר יהושע לה' ביום תת ה' את האמורי לפני בני ישראל ויאמר לעיני ישראל שמש בגבעון דום וירח בעמק אילון.
כ׳
וידום השמש וירח עמד עד יקום גוי אויביו ולא היה כיום ההוא לפניו ואחריו לשמוע ה' בקול איש כי ה' נלחם לישראל.
על הפרק
פרק זה מתאר את כיבוש העי לאחר הכישלון הראשון בגלל חטא עכן, ואת ברית הגבעונים שהערימו על יהושע. בקרב גבעון עמד השמש בחצי השמים ולא נטה לבוא כיום תמים, וה' נלחם לישראל.