בחר פרק (1-91)
ספר הישר - פרק צ׳
מלחמות הכיבוש
א׳
ויהי אחרי הכות יהושע את חמשת מלכי האמורי ויעבור יהושע וכל ישראל עמו ממקדה לבנה וילחם עם לבנה.
ב׳
ויתן ה' גם אותה ביד ישראל ואת מלכה ויכה לפי חרב ואת כל הנפש אשר בה לא השאיר בה שריד.
ג׳
ויעבור יהושע וכל ישראל עמו מלבנה לכישה ויחן עליה וילחם בה ויתנה ה' ביד ישראל וילכדה ביום השני ויכה לפי חרב.
ד׳
אז עלה הורם מלך גזר לעזור את לכיש ויכהו יהושע ואת עמו עד בלתי השאיר לו שריד.
ה׳
ויעבור יהושע וכל ישראל מלכיש עגלונה ויחנו עליה וילחמו עליה וילכדוה ביום ההוא ויכוה לפי חרב.
ו׳
ויעל יהושע וכל ישראל מעגלון חברונה וילחמו עליה וילכדוה ויכוה לפי חרב ואת מלכה ואת כל עריה ואת כל הנפש אשר בה.
ז׳
וישב יהושע וכל ישראל עמו דבירה וילחם עליה וילכוד אותה ואת מלכה ואת כל עריה ויכום לפי חרב.
ח׳
ויכה יהושע את כל הארץ ההר והנגב והשפלה והאשדות ואת כל מלכיהם לא השאיר שריד כאשר ציוה ה' אלהי ישראל.
ט׳
וישמע יבין מלך חצור וישלח אל יובב מלך מדון ואל מלך שמרון ואל מלך אכשף ואל כל מלכי הצפון.
י׳
ויצאו הם וכל מחניהם עמם עם רב כחול אשר על שפת הים לרוב וסוס ורכב רב מאוד.
י״א
ויועדו כל המלכים האלה ויבואו ויחנו יחדיו אל מי מרום להילחם עם ישראל.
י״ב
ויאמר ה' אל יהושע אל תירא מפניהם כי מחר כעת הזאת אנכי נותן את כולם חללים לפני ישראל את סוסיהם תעקר ואת מרכבותיהם תשרוף באש.
י״ג
ויבוא יהושע וכל עם המלחמה עמו עליהם על מי מרום פתאום ויפלו בם ויתנם ה' ביד ישראל ויכום וירדפום.
י״ד
ויעשר יהושע את סוסיהם ואת מרכבותיהם שרף באש וישב יהושע וילכוד את חצור ואת מלכה הכה בחרב כי חצור היא ראש כל הממלכות האלה.
ט״ו
ויכו את כל הנפש אשר בה לפי חרב ואת חצור שרף באש ואת כל ערי המלכים האלה ואת כל מלכיהם לכד יהושע ויכם לפי חרב.
ט״ז
ויהי כל המלכים אשר הכה יהושע שלושים ואחד מלך מעבר הירדן ומעברו.
י״ז
ימים רבים עשה יהושע את המלחמה עם כל המלכים האלה כי מאת ה' היתה לחזק את לבם לקראת המלחמה את ישראל למען החרימם.
י״ח
ויקח יהושע את כל הארץ הזאת ההר ואת כל הנגב ואת כל ארץ הגושן ואת השפלה ואת הערבה ואת הר ישראל ושפלתו ויתן אותה יהושע לנחלה לישראל כמחלקותם לשבטיהם והארץ שקטה ממלחמה.
על הפרק
פרק זה מתאר את המשך מלחמות הכיבוש של ארץ כנען בימי יהושע. יהושע הכה את מלכי הדרום ואת מלכי הצפון ולכד עיר אחר עיר, ולא השאיר שריד עד כלותו את כל מלכי הארץ כאשר ציוה ה' את משה.